اسلام آباد ۔ 2 نومبر (اے پی پی) ڈائریکٹر جنرل آئی ایس پی آر میجر جنرل آصف غفورآکھیا جو آسیہ مسیح دے مقدمے اچ قانونی طریقہ کار دے مطابق پٹیشن دائر تھی اے،ایں تے قانونی کاروائی چلنڑ ڈیو،پاکستان دی فوج دی خواہش اے جو امن عامہ دی صورتحال خراب کیتے بغیر اے مسئلے حل تھیوے،دھرنے اچ فوج دے خلاف گالھیں افسوسناک ہن ،آئی ایس آئی دے آفیسر مذاکرات سانگے ونجنڑ آلے حکومتی وفد دا حصہ ہن ،ساریاں توں پہلے تاں حکومت دی ذمہ واری اے جئیں دے بعد پولیس اتے رینجرز اتے ولا اگر افواج پاکستان کوں سڈیا گیا جو ولا آرمی چیف اپنڑاں مشورہ ڈیسن۔جمعہ کوں پی ٹی وی نال ٹیلی فون تے گالھ مہاڑ کریندیں ہوئیں انہاں آخھیا جو آسیہ مسیح کیس اچ دائر پٹیشن سپریم کورٹ سماعت سانگے مقرر کر گھدی اے اتے کجھ ڈینھ اچ اوندی تاریخ آ ویسی ،اے کیس ہک قانونی طریقہ کار دے مطابق اے اتے میڈی اپنڑی ساری دینی جماعتاں توں درخواست اے جو ایں پٹیشن تے قانونی کاروائی چلنڑ ڈیون۔ ڈی جی آئی ایس پی آرآکھیا جو پچھلے کجھ ڈینھ اچ ملک اچ امن و امان دی صورتحال بنڑی ہوئی اے،اساڈی مذہبی جماعتاں آسیہ مسیح کیس اچ سپریم کورٹ دے فیصلے دے خلاف ملک اچ دھرنے ڈتے پئن ،جتھاں انہاں دے احساسات دی گالھ اے تاں پاکستان دے مسلماناں دا حضور اکرمﷺ نال محبت دا رشتہ اے،اساں انہاں دی امت ہیسے،کوئی وی مسلمان حضور اکرم نال محبت تے سمجھوتہ نی کر سگدا،حضور اکرم دی شان اچ گستاخی تے اساں ساریاں دے جذبات مجروع تھیندن ایں اچ کوئی شک ای کائنی۔انہاں آکھیا جو آسیہ مسیح کیس پچھلے ڈاہ سالیں توں عدالتاں اچ اے،جتھاں پہلے اونکوں سزا تھی،او قید اچ رہی اتے ہنڑ سپریم کورٹ ایں مقدمے تے قانونی طریقہ کار دے مطابق اپیل دا فیصلہ سنڑائے ۔
