اسلام آباد ۔ 2 مارچ (اے پی پی) سینیٹ دیاں 52 نشستاں تے انتخاب (اج) ہفتے کوں تھیسی۔ حکمران جماعت مسلم لیگ (ن) دے سارے ارکان عدالت عظمیٰ دے فیصلے بعد بعد آزاد حیثیت اچ الیکشن اچ حصہ گھنسن۔ الیکشن کمیشن توں سینیٹ انتخابات سانگے انتظامات کو ں چھیکڑی شکل ڈے ڈتی گی اے ۔ پنجاب، سندھ، خیبر پختونخوا تے بلوچستان دے سینیٹرز دے انتخاب سانگے پولنگ چارے متعلقہ صوبائی اسمبلیاں اچ جڈاں جو اسلام آباد تے فاٹا دیاں سیٹاں سانگے پولنگ قومی اسمبلی اچ تھیسی ،سندھ تے پنجاب توں 12,12سینیٹرز دا انتخاب تھیسی جڈاں جو کے پی کے تے بلوچستان توں 11,11سینیٹرز دا انتخاب تھیسی ،فاٹا توں چار اسلام آباد توں ڈو ارکان ایوان بالا دا حصہ بنڑ ویسن ۔تفصیل دے مطابق سینیٹرز دی آئینی مدت چھی سال اے تے ہر ترائے سال بعد سینیٹ دے ادھے ارکان مد ت پوری کرتے ریٹارئرڈ تھی ویندن ،تے ادھے نویں منتخب تھی تے آندن ۔سینیٹ دیاں ادھیاں یعنی 52 نشستاں تے انتخابات اج تھیندے پن ۔2018دے سینیٹ انتخابات اچ مجموعی طور تے 131 امیدوار میدان اچ ہن۔ سارے ملک توں پیپلز پارٹی دے 20، ایم کیو ایم پاکستان دے 14، تحریک انصاف دے 13، پاک سرزمین پارٹی دے4 جڈاں جو 65 آزاد امیدوار سینیٹ انتخابات اچ حصہ گھنسن۔ آزاد امیدواراں اچ مسلم لیگ(ن)دے 23 امیدوار وی شامل ہن جیرھے جو پارٹی ٹکٹ تے الیکشن کائناں لڑ سگسن کیوں جو عدالتی فیصلے دے بعد انہاں کوں آزاد امیدوار دی حیثیت نال انتخاب لڑنڑ دی اجازت ڈتی گی اے ۔ پنجاب اتے سندھ اچ 7، 7 جنرل نشستاں، تریمتیں تے ٹیکنوکریٹ دیاں 2، 2 نشستاں تے ہک اقلیتی نشست تے انتخاب تھیسی جڈاں جو خیبر پختونخوا اتے بلوچستان اچ 7،7 جنرل نشستاں جڈاں جو تریمتیں تے ٹیکنوکریٹ دیاں 2، 2 نشستاں تے انتخاب تھیسی ۔ پنجاب سانگے 1600 بیلٹ پیپرز، سندھ سانگے 800، خیبر پختونخوا سانگے 600، بلوچستان سانگے 300، اسلام آباد سانگے 800 تے فاٹا سانگے 50 بیلٹ پیپرز دی چھپائی دا کم پورا تھی گے تے متعلقہ ریٹرننگ افیسرز دے حوالے کر ڈتے گن ۔ سیکورٹی دے حوالے نال رینجرز تے ایف سی کو ں چارے صوبائی اسمبلیاں تے پارلیمنٹ ہاﺅس دے باہروں تعینات کر ڈتا گے ۔ پولنگ داآغاز سویلے 9 وجے تھیسی تے بغیر کہیں وقفے دے 4 بجے تئیں جاری رہ ویسی ۔ ووٹ دی رازداری کوں یقینی بنڑاونڑ تے کہیں وی ہنگامی صورت حال نال نبڑنڑ سانگے الیکشن کمیشن سارے ریٹرننگ افسراں کوں مجسٹریٹ درجہ اول دے اختیارات وی ڈے ڈتن ۔
